БНСУ-ын Эксим банкны эдийн засгийн хамтын ажиллагааны сангийн хөрөнгө оруулалтаар Сонгинохайрхан дүүргийн нэгдүгээр хорооны нутаг дэвсгэр Баянголын амын 10 га талбайд 2007 айлын орон сууц барих төслийг хэрэгжүүлж буй. Төслийн хүрээнд 960 хүүхдийн сургууль, 330 ортой цэцэрлэг барихаар төлөвлөгдсөн. Эрчим хүчний хэмнэлттэй, бага дунд орлоготой өрхөд нийцсэн нийт 14 ширхэг 10 давхар орон сууц барих юм. Дээрх орон сууцыг барих нээлттэй тендерийг өнгөрсөн нэгдүгээр сард зарлаж барилгын ерөнхий гүйцэтгэгчээр БНСУ-ын “Ил Сүнг” ХК шалгарсан.

Үүнтэй холбогдуулан өнөөдөр НЗДТГ-ын дарга П.Хадбаатар, гүйцэтгэгч байгууллага болох “Ил Сүнг” ХК-ийн ерөнхий захирал Ёо Пил Санг нар орон сууц барих гэрээнд гарын үсэг зурлаа. Арга хэмжээнд Нийслэлийн Орон сууцны бодлогын газрын дарга Г.Ганхүү, “Ил Сүнг” ХК-ийн бизнесийн хэлтсийн дэд ерөнхийлөгч Юнги Ил Жун, Монгол талыг хариуцсан дэд ерөнхийлөгч Бэк ун Хэнг нар байлцлаа.

Энэ үеэр НЗДТГ-ын дарга П.Хадбаатар: - Улаанбаатар хотын агаар орны бохирдлыг бууруулах, гэр хорооллыг орон сууцжуулах ажлын хүрээнд хийгдэж буй Баянголын амын орлогод нийцсэн орон сууц төслийн гүйцэтгэгчээр сонгон шалгарсан та бүхэнд баяр хүргэе. 36 сарын хугацаанд хэрэгжих энэхүү төслийн ажилд нийслэлийн зүгээс бүхий л талаар хамтран ажиллах болно гэв.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС