​"The New York Times" сонинд мягмар гарагт нийтэлсэн мэдээллээр, "Amazon" компани ойрын жилүүдэд АНУ дахь хагас сая гаруй ажилтныг орлох томоохон хэмжээний автоматжуулалтын өргөтгөл хийхээр төлөвлөж байна.

​Компанийн дотоод баримт бичиг болон ярилцлагуудаас үзэхэд, "Amazon"-ы робот техникийн хэлтэс нь үйл ажиллагааныхаа дөрөвний гурвыг автоматжуулах зорилт тавьжээ.

​Үр дүн ба Хэмнэлт:

​Энэхүү төлөвлөгөө хэрэгжвэл АНУ-ын цахим худалдааны томоохон компани 2027 он хүртэл 160 мянга гаруй хүнийг ажилд авах шаардлагагүй болох юм.

​Мөн 2025-2027 оны хооронд 12.6 тэрбум ам.долларыг хэмнэх боломжтой.

​"Amazon" нь 2033 он хүртэл ажиллах хүчний тоог нэмэгдүүлэхгүйгээр бүтээгдэхүүний борлуулалтыг хоёр дахин өсгөхөөр төлөвлөж байна.

​Технологийн нөлөөлөл:

​Автоматжуулалт нь ажилтнуудыг давхардсан ажлаас чөлөөлж, роботын засвар үйлчилгээ, инженерчлэлд техникийн шинэ ажлын байруудыг бий болгох ажээ. Олон нийтийн сөрөг хандлагаас зайлсхийхийн тулд "Amazon" нь "робот", "автоматжуулалт" гэхээсээ илүүтэй "дэвшилтэт технологи", "кобот" гэх мэт нэр томъёог илүүд үзэж байгааг тус сонинд онцолсон байна.

​"Amazon"-ын хариу тайлбар:

​Харин "Amazon"-ын зүгээс уг мэдээний агуулгыг үгүйсгэж, "The New York Times"-т дурдсан баримт бичгүүд нь бүрэн бус бөгөөд компанийн ажилд авах ерөнхий стратегийг тусгаагүй гэж мэдэгджээ.

​Хэвлэлийн төлөөлөгч Келли Нантел, "Amazon" удахгүй болох баярын улиралд 250 мянган хүнийг ажилд авахаар төлөвлөж байгааг дурдсан байна. Гэсэн хэдий ч эдгээр ажлын байрны хэд нь байнгынх болохыг тодруулахаас татгалзжээ. 2018 оноос хойш "Amazon"-ын АНУ дахь ажиллах хүчний тоо эрс нэмэгдэж, одоогоор 1.2 сая орчим ажилтантай болоод байна.