Байгаль орчин, уур амьсгалын өөрчлөлтийн яам (БОУАӨЯ)-ны Ойн нөөцийн мэргэжлийн зөвлөлийн энэ сарын 9-ний өдрийн хуралдаанаар Монгол Улсын ойн сангийн шинэчилсэн тоо баримтыг хэлэлцэж, албан ёсоор баталгаажууллаа.
Шинэчилсэн тооллогоор Монгол орны нийт 156.4 сая га газар нутгийн 13.6 сая га нь ойгоор бүрхэгдсэн талбай болох нь тогтоогдов. Ингэснээр манай улсын ойрхог чанар 8.71 хувьтай байна.
Өмнө нь Монгол орны нийт газар нутгийн 8–9 орчим хувь буюу 14–15 сая га талбайг ой гэж тооцдог байсан бол энэ удаагийн шинэчилсэн тооллогоор бодит нөөцийг илүү нарийвчлан тогтоожээ. Аливаа улс орны байгаль орчны төлөв байдал, ойрхог чанарыг ийнхүү ой бүхий талбайн бодит хэмжээгээр тооцож үнэлдэг олон улсын жишигтэй.
БОУАӨ-ийн сайдын тушаалаар өнгөрсөн сард Ойн нөөцийн мэргэжлийн зөвлөл-ийн бүрэлдэхүүнийг шинэчлэн баталсан. Уг зөвлөл нь дараах чиг үүргийн хүрээнд шийдвэр гаргаж байна:
Менежмент: Улс, аймаг, нийслэлийн ойн менежментийн төлөвлөгөөг батлах.
Тооллого, судалгаа: Ойн сангийн төлөв байдал, ойн тооллого, зохион байгуулалтын мэдээллийг хэлэлцэх.
Нөхөн сэргээлт: Ойжуулалт болон ойн аж ахуйн үйл ажиллагааны тайланг баталгаажуулах.
Ашиглалт: Ойн дагавар баялгийн нөөц, түүний зохистой ашиглалтад хяналт тавих.
Энэхүү шинэчлэгдсэн тоо баримт нь цаашид "Тэрбум мод" үндэсний хөдөлгөөний хэрэгжилт болон байгаль орчны нөхөн сэргээлтийн бодлогыг тодорхойлоход суурь үзүүлэлт болох юм.
Эх сурвалж: БОУАӨЯ
