Говь-Алтай аймгийн нутаг дэвсгэрт хууль бус ан агнууртай тэмцэх хяналт шалгалтын явцад Монгол Улсын ховор амьтны жагсаалтад багтсан "Алтайн хойлог" шувууг тээвэрлэж явсан зөрчлийг илрүүлэв.
Хэргийн тухай товч: 2026 оны 03 дугаар сарын 27-ны өдөр явуулсан хяналт шалгалтаар иргэн Ө нь "Toyota Lexus-600" маркийн тээврийн хэрэгслээр дээрх ховор шувууг тээвэрлэж явжээ. Тухайн иргэнийг Алтайн хойлог шувууг хууль бусаар агнасан байж болзошгүй хэмээн үзэж, эд мөрийн баримтыг хураан авч, Говь-Алтай аймаг дахь Цагдаагийн газарт шалгалтын ажиллагааг үргэлжлүүлж байна.
Экологи-эдийн засгийн үнэлгээ ба нөхөн төлбөр: Монгол Улсын Засгийн газрын 2023 оны 260 дугаар тогтоолын дагуу хойлог шувууны экологи-эдийн засгийн үнэлгээг 217,000 төгрөгөөр тогтоосон байдаг. Амьтны тухай хуулийн дагуу, байгаль орчинд учруулсан хохирлыг тооцохдоо уг үнэлгээг хоёр дахин нэмэгдүүлж (нийт 434,000 төгрөг) нөхөн төлүүлэхээр зохицуулсан байдаг.
Хуулийн хариуцлага: Ховор амьтныг тусгай зөвшөөрөлгүйгээр агнасан, тээвэрлэсэн тохиолдолд Эрүүгийн хуулийн 24.5.1-д зааснаар дараах ял шийтгэлийг оногдуулдаг. Үүнд:
Торгох ял: 5,400-аас 27,000 нэгжтэй тэнцэх хэмжээний төгрөгөөр торгох;
Зорчих эрхийг хязгаарлах: 1-ээс 5 жил хүртэл хугацаагаар;
Хорих ял: 1-ээс 5 жил хүртэл хугацаагаар тус тус шийтгэхээр хуульчилсан байна.
Иймд иргэн та хуулиар хамгаалагдсан ховор амьтдыг агнах, тээвэрлэх, тэдгээрийн гаралтай түүхий эдийг хадгалахаас татгалзаж, хууль бус үйлдлээс сэргийлэхийг анхааруулж байна.
