Үндэсний статистикийн хорооны мэдээллээр өнгөрсөн онд Монголд үүссэн хог хаягдлын 70.7 хувийг хогийн цэгт булжээ. Дахин боловсруулалт ердөө 9.5 хувьтай байгаа нь бусад орныхоос нэлээд бага үзүүлэлт юм.
Хог хаягдлын төрлөөр нь авч үзвэл цаас 330 мянга орчим тонн, барилгын хог 298.4 мянган тонн, хүнсний хог 246.1 мянган тонн, хуванцар 219.7 мянган тонн, шил 176.3 мянган тонн байна.
Нийт хог хаягдлын 70.7 хувийг хогийн цэгт булж, 3.2 хувийг шатааж устгаж, 6.5 хувийг бусад аргаар зайлуулжээ. Мэргэжилтнүүд хог хаягдлыг үүсэх эх үүсвэр дээр нь ангилах нь тогтвортой хэрэглээ, байгаль орчныг хамгаалахад чухал ач холбогдолтой гэж онцолж байна.
