Шилэн дансны мэдээллээр Монголын үндэсний олон нийтийн радио, телевиз (МҮОНРТ) 2026 оны эхний есөн сард улсын төсвөөс 6.2 тэрбум төгрөгийн санхүүжилт авчээ. Энэ нь өнгөрсөн оны мөн үеийнхээс 2 тэрбум төгрөгөөр буюу 24.5 хувиар бага байна. Төрийн өмчит МОНЦАМЭ агентлагийн энэ оны төсөв ч 5.3 хувиар буурсан байна.
МҮОНРТ: Гуравдугаар улиралд санхүүжилт огцом буурав
МҮОНРТ Шилэн дансны тухай хуулийн 6.4.4 дэх заалтын дагуу улсын төсвөөс авсан санхүүжилтээ улирал бүр тайлагнадаг. Тайлангаас үзэхэд Сангийн яамнаас урсгал шилжүүлгээр олгосон санхүүжилт оны эхнээс өссөн дүнгээр дараах байдалтай байна.
| Хугацаа | 2025 он | 2026 он | Өөрчлөлт |
|---|---|---|---|
| I улирал | 2.37 тэрбум ₮ | 2.28 тэрбум ₮ | −3.9% |
| I–II улирал | 4.77 тэрбум ₮ | 4.56 тэрбум ₮ | −4.5% |
| I–III улирал | 8.22 тэрбум ₮ | 6.21 тэрбум ₮ | −24.5% |
| Бүтэн жил | 9.55 тэрбум ₮ | — | — |
Эхний хагас жилд санхүүжилт өмнөх оны түвшинтэй ойролцоо байсан. Гэвч зөвхөн гуравдугаар улиралд 1.65 тэрбум төгрөг олгосон нь өнгөрсөн оны мөн үеийн 3.45 тэрбум төгрөгийн тал хүрэхгүй байна.
МҮОНРТ 2025 оны эхний улирлын тайландаа тухайн жилд улсын төсвөөс 11.67 тэрбум төгрөг авахаар тусгасан байв. Харин жилийн эцэст бодитоор 9.55 тэрбум төгрөг буюу төлөвлөснийхөө 81.8 хувийг авчээ.
Мөн МҮОНРТ энэ оны эхний болон хоёрдугаар улирлын тайлангаа хуульд заасан хугацаанаас хоцорч, долдугаар сарын 22-нд оруулсан байна.
МОНЦАМЭ: Жилийн төсөв 330 сая төгрөгөөр буурав
Мэдээллийн МОНЦАМЭ агентлагийн жилийн төсөв 2024 онд 5.58 тэрбум, 2025 онд 6.22 тэрбум төгрөг байжээ. 2026 онд 5.89 тэрбум төгрөг болж, өмнөх оныхоос 329.8 сая төгрөгөөр буюу 5.3 хувиар буурсан байна. Агентлаг энэ оны эхнээс сүүлд тайлагнасан сар хүртэл 4.27 тэрбум төгрөг зарцуулсан нь тухайн хугацааны төлөвлөгөөний 98.5 хувьтай тэнцэж байна.
Яамдын хэвлэл мэдээллийн зардал ил тод бус
Харин яамд хэвлэл мэдээллийн байгууллагад хэдэн төгрөг зарцуулж байгааг Шилэн данснаас тодорхойлох боломжгүй байна. Төсвийн байгууллагуудын зардлын ангилалд хэвлэл мэдээлэл, сурталчилгааны зардал гэсэн тусдаа мөр байхгүй. Энэ зардал "бусдаар гүйцэтгүүлсэн бусад ажил үйлчилгээ" зэрэг ерөнхий ангилалд бусад зардалтай хамт нэгтгэгддэг. Жишээ нь, Сангийн яамны 2025 оны тайланд ийм ерөнхий ангиллын зардал 5.7 тэрбум орчим төгрөг байгаа ч үүнээс хэдийг нь хэвлэл мэдээлэлд зарцуулсныг ялгах аргагүй юм.
Эх сурвалж: Шилэн данс (shilendans.gov.mn), 2026.10.20-ны байдлаар
