Байгаль орчин, уур амьсгалын өөрчлөлтийн сайд Ц.Сандаг-Очир болон Тусгай хамгаалалттай газар нутгийн бодлогын газрын дарга Ц.Уранчимэг нар Нөмрөгийн дархан цаазат газарт гарсан ой, хээрийн түймрийн улмаас байгаль орчинд учирсан хохирлыг нарийвчлан үнэлэх, цаашид авах арга хэмжээний талаар холбогдох албаныханд үүрэг чиглэл өглөө.

Сайд Ц.Сандаг-Очир түймрийн улмаас учирсан хохирлыг бүрэн тогтоож, буруутай этгээдээр нөхөн төлүүлэх арга хэмжээ авахыг онцолсон юм.

Нөмрөгийн дархан цаазат газарт учирсан хохирлыг тооцох ажлын хэсэг одоогоор газар дээр нь ажиллаж байна. Ажлын хэсэг дараах асуудлыг судалж, дүгнэлт гаргана:

• Түймрийн улмаас учирсан экологийн болон эд хөрөнгийн хохирол;
• Түймэртэй тэмцэхэд гарсан зардал;
• Экосистемийн нөхөн сэргэх боломж;
• Шаардлагатай хамгаалалт, нөхөн сэргээлтийн арга хэмжээ.

Ажлын хэсэг холбогдох баримт, мэдээллийг нэгтгэн баримтжуулж, эцсийн дүгнэлтээ гаргах юм.