Иргэн Г. Уянга Сүхбаатарын талбайд, Төрийн ордны өмнө хэвлэл мэдээллийн байгууллагуудын сэтгүүлчдэд урьдчилан бэлдсэн мэдэгдлээ уншиж танилцуулав. Тэрбээр хөгжлийн бэрхшээлтэй иргэд, төрийн албан хаагчдад зориулсан орон сууцыг хэвлэл мэдээллийн сайтын эзэд олноор авсан гэж мэдэгдлээ.
Хөгжлийн бэрхшээлтэй иргэд, төрийн албан хаагчдад зориулсан орон сууцыг хуулиар тусгай нөхцөлтэйгөөр олгодог. Орон сууцанд хамрагдах эрхийн шалгуурыг хангаагүй этгээдүүд хуваарилалтад хамрагдсан эсэх асуудлыг Г. Уянга олон нийтэд ил болгож буй юм.
Мэдэгдлийн үеэр Г. Уянга төрийн албан тушаалтны гарын үсэгтэй "БАТЛАМЖ" гэсэн баримтын хуулбарыг сэтгүүлчдэд үзүүлсэн. Баримт дээрх эзэмшигчийн нэрийг далдалсан байв. Тэрбээр орон сууц авах эрхийг ийм батламжаар баталгаажуулсан гэж мэдэгдэж байна.
Мэдэгдэлд дурдагдсан орон сууц хариуцсан байгууллага болон хэвлэл мэдээллийн сайтуудын эзэд энэ талаар одоогоор албан ёсны тайлбар өгөөгүй байна. Nmnews.mn холбогдох талуудаас тайлбар авахаар ажиллаж байгаа бөгөөд хариу ирмэгц уншигчдадаа хүргэнэ.
