C.Сэтгүүлч
Ангилал
Хэзээ
20 цагийн өмнө
Үсгийн хэмжээ
Хайгуулд гүний ус ашиглахыг хориглох заалтыг хасахыг геологичид УИХ-аас хүсэв
20 цагийн өмнө
C.Сэтгүүлч
Хайгуулд гүний ус ашиглахыг хориглох заалтыг хасахыг геологичид УИХ-аас хүсэв
Монголын Үйлдвэрлэлийн геологичдын холбоо УИХ-д хэлэлцэж буй Усны тухай хуулийн шинэчилсэн найруулгын төслөөс ашигт малтмалын хайгуулд газар доорх цэнгэг ус ашиглахыг хориглосон 48.6 дугаар заалтыг хасахыг шаардлаа. Хориг хэрэгжвэл хайгуулын өрөмдлөг, хээрийн судалгаа зогсох эрсдэлтэй гэж холбоо анхааруулж байна.

Хуулийн төслийн 48 дугаар зүйлийн 48.6-д "ашигт малтмалын хайгуулын үйл ажиллагаанд газар доорх цэнгэг ус ашиглахыг хориглох" гэж заасан байна. Монголын Үйлдвэрлэлийн геологичдын Холбооны үзэж байгаагаар энэ заалт "геологи, хайгуулын салбарт ноцтой хүндрэл учруулахаар байна". Холбоо саналаа 11-р сарын 13-нд хүргүүлсэн тухайгаа мэдээлсэн байна.

Усгүйгээр өрөмдөх аргагүй

Ашигт малтмалын хайгуулын өрөмдлөгт ус зайлшгүй шаардлагатай тул шууд хориг нь хээрийн судалгааг зогсоох асуудал дагуулна гэж геологичид тайлбарлаж байна. Гадаргын ус хомс говь, тал нутагт газар доорх ус л цорын ганц бодит эх үүсвэр байдаг гэж тэд анхааруулсан.

Төсөлд хайгуулын ажилд хэрэглэх ус, хээрийн ажилчдын ахуйн хэрэгцээ, өрөмдлөгийн технологид хэрэглэх усыг ялгаж заагаагүй нь хуулийг хэрэгжүүлэхэд маргаан үүсгэх нөхцөл болно гэж холбоо үзэж байна. Хайгуул зогсвол шинэ орд илрүүлэх, нөөцийг нэмэгдүүлэх боломж хязгаарлагдаж, хөрөнгө оруулалтын орчин доройтно гэж тэд санаа зовнижээ.

Холбоо заалтыг бүрэн хасахыг, хэрэв тэр нь боломжгүй бол мэргэжлийн шинжээчдийн багийг оролцуулж, шинжлэх ухаанд суурилсан хувилбар боловсруулахыг санал болгосон.

Хуулийн төсөл УИХ-д завсарлага дараалан авав

Усны тухай хуулийн шинэчилсэн найруулгын төслийг УИХ-ын гишүүн Л.Мөнхбаясгалан тэргүүтэй зургаан гишүүн 10-р сарын 23-нд өргөн мэдүүлсэн. Төсөл нь усны нөөцийг хамгаалах, хэмнэх, дахин ашиглахыг дэмжих, хүн амын унд, ахуйн хэрэгцээг тэргүүнд тавих зарчимд суурилжээ.

УИХ төслийг хэлэлцэх эсэхийг асуудал дээр Ардчилсан намын бүлэг таван хоногийн завсарлага авч, 11-р сарын 13-нд завсарлага дуусмагц МАН-ын бүлэг мөн таван хоногийн завсарлага хүссэн гэж iKon.mn мэдээлсэн. Гишүүд төслийг судалж, мэргэжлийн байгууллагуудын санал авах шаардлагатай гэж тайлбарласан ажээ.

Хэлэлцүүлгийн үеэр зарим гишүүд төсөл нь уул уурхайн салбарт газар доорх цэнгэг ус ашиглахыг хориглож байгааг шүүмжилж, энэ хэвээр батлагдвал гүний усанд түшиглэсэн уурхай, баяжуулах үйлдвэрийн үйл ажиллагаа зогсох эрсдэлтэй гэж анхааруулсан. Энэ нь Эрдэнэт үйлдвэрийн үйл ажиллагаатай зөрчилдөх тухай санаа зовнил ч гарсан ажээ.

 

Энэ мэдээнд таны өгөх сэтгэгдэл
0
0
0
0
0
0
0
0
Зөв
Зөв
Тэнэглэл
Тэнэглэл
Харамсалтай
Харамсалтай
Савж уналаа
Савж уналаа
Буруу
Буруу
Хөөрхөн юм
Хөөрхөн юм
Гайхмаар
Гайхмаар
Бахархмаар
Бахархмаар
Шинэ мэдээ
Онцлох мэдээ
© 2026 Нийслэлийн мэдээ
Үндсэн цэс
Бусад цэс