Монголын аялал жуулчлалын мэргэжлийн холбооны мэдээллээр 2026 оны эхнээс хойш нийт 958,470 жуулчин манай улсад ирсэн байна. Зөвхөн 11 дүгээр сарын 1-15-ны хооронд 32,882 жуулчин ирсэн нь өдөрт дунджаар 2,200 орчим болж байгаа юм. Нэг сая гэсэн тоонд хүрэхэд 41,530 жуулчин дутуу байна.
Монгол Улс нэг жилд нэг сая жуулчин хүлээн авах зорилтыг олон жил дэвшүүлж ирсэн. Энэ удаа тэр зорилтдоо урьд өмнө байгаагүй ойртоод байна.
Өнгөрсөн оноос даруй 100 мянгаар илүү
2025 онд Монголд нийт 854,235 гадаадын жуулчин ирсэн. Энэ онд ирсэн жуулчдын тоо оны эцэс болоогүй байхад өнгөрсөн жилийнхээс 104,235-аар буюу 12.2 хувиар давчихаад байна.
2025 онд ирсэн жуулчдын 55 хувийг хоёр хөрш болох БНХАУ, ОХУ-ын иргэд эзэлж байсан. Хөрш орнуудаас ирэх жуулчид салбарын гол тулгуур хэвээр байгааг энэ харуулж байна.
Өвлийн улиралд ч урсгал тасраагүй
Аялал жуулчлалын гол улирал дуусч, хүйтний улирал эхэлсэн хэдий ч 11 дүгээр сарын эхний хагаст ирсэн жуулчдын тоо тогтвортой байна. Энэ хурдаараа явбал улсын хэмжээнд түүхэн дээд амжилт тогтоох нь ойрхон байна.